Proverbs 10

Izaga ZikaSolomoni

1Izaga zikaSolomoni:

Indodana ehlakaniphileyo iletha ukuthokoza kuyise,
kodwa indoda eyisiwula iletha ukudabuka kunina.

2Inotho ezuzwe ngobuqili kayisizi lutho,
kodwa ukulunga kukhulula ekufeni.

3 UThixo kayekeli abalungileyo belambile
kodwa uyavimbela izinkanuko zezixhwali.

4Izandla ezivilaphayo ziletha ubuyanga,
kodwa izandla ezikhutheleyo ziletha inotho.

5Lowo obutha amabele ngesikhathi sawo yindodana ehlakaniphileyo,
kodwa olalayo ngesikhathi sokuvuna yindodana ehlazisayo.

6Izibusiso zingumqhele womuntu olungileyo.
Kodwa ubudlwangudlwangu bugcwele emlonyeni womubi.

7Umkhumbulo ngomuntu olungileyo ubusisekile
kodwa ibizo lesigangi lizabola.

8Abahlakaniphileyo enhliziyweni bayalalela izeluleko,
kodwa isiphukuphuku esivala ngomsindo siyadilika.

9Umuntu oqotho uhamba engelakwesaba,
kodwa ohamba ngezindlela ezigobileyo uzadaluleka.

10Lowo oqwayiza ngomona uletha usizi,
lesiphukuphuku esivala ngomsindo siyadilika.

11Umlomo womuntu olungileyo ungumthombo wokuphila,
kodwa ubudlwangudlwangu bugcwele emlonyeni womubi.

12Inzondo idunga ingxabano,
kodwa uthando lusibekela bonke ububi.

13Ukuhlakanipha kufunyanwa ezindebeni zalowo oqedisisayo;
kodwa uswazi lwehla emhlane walowo ongezwayo.

14Abantu abahlakaniphileyo bayaluqoqa ulwazi,
kodwa umlomo wesiwula ugwegwa ukubhidlika.

15Inotho yezikhulu ingumuzi wazo ovikelweyo;
kodwa ubuyanga buyikudilika kwabampofu.

16Inzuzo yabalungileyo iyabaphilisa,
kodwa umholo wababi ubalethela ukujeziswa.

17Lowo olalela ukuqondiswa utshengisa indlela yokuphila,
kodwa lowo oyala ukwelulekwa wedukisa abanye.

18Lowo ofihla inzondo yakhe ulendebe ezilamanga,
kuthi lowo onyeyayo yisiwula.

19Lapho okwande khona amazwi, isono kasisweleki,
kodwa lowo ogcina ulimi lwakhe uhlakaniphile.

20Ulimi lomuntu olungileyo luyisiliva esikhethiweyo,
kodwa inhliziyo yesigangi kayisilutho.

21Izindebe zolungileyo ziphilisa abanengi;
kodwa iziwula ziyafa ngokuswela ingqondo.

22Isibusiso sikaThixo siletha inotho,
leyonotho ingabi lahlupho.

23Isiwula siyajabula ezenzweni zobubi,
kodwa umuntu ozwisisayo uthokoza ngokuhlakanipha.

24Lokho akwesabayo omubi kuzamfumana;
kodwa lokho akuloyisayo olungileyo uzakuphiwa.

25Nxa isiphepho sesikhukhule sedlula,
ababi sebedlule, kodwa abalungileyo bagxilile lanini.

26Njengeviniga emlonyeni, lentuthu emehlweni,
unjalo olesidensi kulabo abamthumayo.

27Ukumesaba uThixo kuyengeza ubude bempilo,
kodwa iminyaka yababi iyafinyezwa.

28Ikusasa yabalungileyo iyikuthokoza,
kodwa amathemba ababi aphelela ezeni.

29Indlela kaThixo yisiphephelo sabalungileyo,
kodwa iyikubhidlika kwalabo abenza okubi.

30Abalungileyo kabasiphuleki,
kodwa ababi kabayikusala elizweni.

31Umlomo womuntu olungileyo ukhupha inhlakanipho,
kodwa ulimi oluxhwalileyo luzaqunywa.

32Izindebe zabalungileyo ziyakwazi okufaneleyo,
kodwa umlomo wezigangi ukhupha izibozi.